CLOUD afunguka na kusema "Siwafichi watoto wangu wa nje ya ndoa"

MAMBO vipi mpenzi msomaji wa safu ya Staa na Mwana  kama ilivyo kawaida ya safu hii ni kuwafuata mastaa ambao wamejaliwa kupata watoto, haijalishi wakiwa ndani ya ndoa au nje.Leo tumekutana na Mussa Issa ‘Cloud’ ukimuita 112 unakuwa haujakosea. Kwa upande wake ana watoto watatu, wawili aliwazaa nje ya ndoa na mmoja mwenye umri wa miezi kumi ni wa ndani ya ndoa.

Ungana nami katika mahojiano yafuatayo niliyofanya naye nyumbani kwake, Mikocheni, jijini Dar ili kuweza kuwafahamu watoto wake kwa undani:

Amani: Mambo vipi Cloud?

Cloud: Safi kabisa, karibu sana nyumbani.

Amani: Nafahamu hivi karibuni mlijaliwa kupata mtoto wa kiume, hongera sana.

Cloud: Asante sana yupo jembe, anaitwa Nabil.

Amani: Vipi ana ndugu zake wengine?

Cloud: Ndiyo ana dada yake mkubwa anayeitwa Afrah ambaye ana miaka 16 na kaka yake mwingine  aitwaye Annuary mwenye miaka nane lakini wote hao sikai nao.

Amani: Hao wawili wanakaa wapi?

Cloud: Afrah yupo Zanzibar kwa mama yake na Annuary anaishi Mbezi.

Amani: Mama zao vipi? Bado mpo pamoja au mmetengana?

Cloud: Hapana bwana si unajua ujana tena, nilizaa nao enzi za ujana na sasa kila mmoja ana mambo yake.

Amani: Ulijisikiaje kusikia mkeo Cythia amejifungua Nabil?

Cloud: Kwa kweli nilifurahi sana na si unajua raha ya ndoa ni mtoto kama Mungu amejalia.

Amani: Ni kitu gani ambacho kinamfanya agundue kuwa baba yupo?

Cloud: Mimi nina sauti yangu moja mtoto wangu anaijua kabisa nikiitoa hiyo, lazima afurahi na kujua mimi nipo ndani.

Amani: Unapokuwa katika kazi za uigizaji ambapo wakati mwingine inachukua hata mwezi mzima bila kurudi nyumbani, watoto wanajisikiaje?

Cloud: Mtoto wangu mkubwa yupo Zanzibar na mara nyingi huwa naenda kwa ajili yake na pia ninapofanya kazi zangu mkoa huuhuu nakimbia mara kwa mara kumuona kisha narejea kufanya kazi zangu.

Amani: Watoto watatu ulionao ndiyo umefunga au bado mchakato unaendelea?

Cloud: Kwa kweli bado, Mungu akinijalia nitaongeza wengine.

Amani: Kuna baadhi ya mastaa wana tabia ya kuficha watoto haswa wa nje ya ndoa, wewe ni miongoni mwao?

Cloud: Mimi siwafichi watoto wa nje ya ndoa ndiyo maana nimekutajia wote. Kuficha watoto ni ulimbukeni hakuna kitu chenye raha na baraka kama watoto. Unawezeje kuwaficha? Wanaofanya hivyo, waache mara moja.

Amani: Haya Cloud nashukuru sana kwa ushirikiano wako.

Cloud: Poapoa, asante sana na karibu tena siku nyingine.

Kwa hisani ya GLP